Home > Beth i’w Wneud a’i Weld > Diwrnodau Allan a Theithiau > Gwyliau Hwyl i’r Teulu

Gwyliau Hwyl i’r Teulu

Gwyl Gaeaf CaerdyddMae gan Gaerdydd a’r fro fwy na digon i ddifyrru plant yn ystod gwyliau llawn hwyl i'r teulu. Mae gennym nifer o amgueddfeydd rhyngweithiol, Atyniadau hanesyddol i’w gweld ac aceri o barciau hyfryd yn cynnig amryw o weithgareddau awyr agored.
 
Rhowch gynnig ar hwylio neu ganŵio ym Mae Caerdydd, lle mae amryw o weithgareddau dŵr ar gael gydol y flwyddyn - fel cystadlaethau hwylio, arddangosfeydd beiciau dŵr a phencampwriaethau polo dŵr.   Mae Canolfan Ymwelwyr Bae Caerdydd ar agor gydol y flwyddyn i roi gwybodaeth am ddigwyddiadau a hanes y bae.
 
Y drws nesaf i’r Tiwb mae Goleulong 2000, ble mae modd gweld y tŵr golau, ystafell yr injan, y cabanau a chapel, neu fwynhau lluniaeth ysgafn yn y 'gali' mewn awyrgylch Gristnogol gyfeillgar. Dafliad carreg o’r Goleulong mae’r Eglwys Norwyaidd, sef hen Eglwys i Forwyr o Norwy a man bedyddio'r awdur Roald Dahl. Mae'r Eglwys wedi'i hailadeiladu’n ddiweddar fel canolfan ddiwylliannol a chelfyddydol.
 
Os hoffech chi wybod pam fod gennym lyn dŵr croyw yma bellach, ewch ar daith i Forglawdd Bae Caerdydd, naill ai ar y bws dŵr neu’r trên ffordd. Mae Trên Ffordd Bae Caerdydd yn gadael o Stuart Street bob awr, gyda sylwebaeth fyw am hanes ‘Tiger Bay’ a’r dociau. Mae Teithiau Bae Caerdydd yn gadael yn rheolaidd o Gei'r Fôr-forwyn ble mae modd cael teithiau hamddenol draw i'r morglawdd neu i fyny afon Taf.

 

Ewch am dro i fyd yn llawn gwyddoniaeth a thechnoleg yn Techniquest Bae Caerdydd, sy’n sicr o roi mwynhad i blant o bob oed. A hoffech chi danio roced, lansio balŵn aer poeth neu rasio gar trydan?  Mae dros 160 o arddangosfeydd ymarferol, gyda phosau a gweithgareddau i ddifyrru’r teulu i gyd. Mae sioeau hefyd yn y Theatr Wyddoniaeth a theithiau o amgylch y Bydysawd yn y Planetariwm. Gall ymwelwyr gynnal eu harbrofion eu hunain yn y Labordy a’r Ystafell Ddarganfod.

 

Nepell o fan hyn mae Canolfan Mileniwm Cymru, yn sefyll uwch pob adeilad arall ym Mae Caerdydd.  Mae’r ganolfan gelfyddydau ac adloniant hon yn gartref i Opera Cenedlaethol Cymru, ac mae’n cynnig amrywiaeth wych o sioeau i blant a sioeau teuluol.

 

I weld y pantomeimau a’r sioeau teuluol gorau yn y ddinas, mae'n rhaid galw heibio'r Theatr Newydd. Agorodd y theatr Edwardaidd hon yn 1906, gan ddathlu ei chanmlwyddiant yn 2006.

 

Bydd Amgueddfa Genedlaethol Caerdydd yn cadw’r holl deulu’n ddiddig am oriau, gydag arddangosfeydd rhyngweithiol, arddangosfeydd hanes naturiol a gweithdai celf i blant.  

 

Mewn 100 acer o gefn gwlad, mae Sain Ffagan yn gartref i un o amgueddfeydd awyr agored mwyaf Ewrop – a chyda mynediad am ddim mae'n lle perffaith i dreulio diwrnod allan gyda'r teulu. Mae gan Amgueddfa Werin Cymru, Sain Ffagan dros ddeugain o adeiladau sydd wedi’u symud fric wrth fric o bob cwr o Gymru a’u hailgodi yn yr amgueddfa.  Mae’r adeiladau’n cynnwys plasty urddasol, bwthyn chwarelwr, tai fferm, teras o chwe bwthyn, tollty a phentref Celtaidd. Yn yr adeiladau, mae crefftwyr yn gweithio i ddangos hen sgiliau traddodiadol. 

 

Camwch yn ôl mewn amser i Bentref Canoloesol Cosmeston, pentref o’r bedwaredd ganrif ar ddeg mewn ardal hyfryd. Gallwch fynd am dro ar eich pen eich hun neu gael taith dywys gyda phentrefwr o’r canol oesoedd, a gweld â’ch llygaid eich hun sut oedd bywyd yn y bedwaredd ganrif ar ddeg. Neu ewch am dro o amgylch Llyn Cosmeston, y gwlypdir a'r goedwig.

 

Mae Parc Treftadaeth y Rhondda ac Amgueddfa Lofaol Cymru ill dau yn rhoi darlun o ddiwylliant a chymeriad hynod cymoedd glo De Cymru, a hynny mewn ffordd ddifyr ac addysgol i bawb o bob oed.  Gallwch weld sut oedd bywyd glowyr o dan y ddaear, mynd ar daith ryngweithiol ac ymweld â stryd bentref o'r 1950au. Gallwch hyd yn oed gael taith o dan y ddaear gyda chyn-lowyr a phrofi sut oedd bywyd go iawn yn y pyllau!